small kine n., adj., or adv.

tiny, not a big deal, plenty, lots - can be used for explanation of size, or emphasis of something with satire to actually mean the other extreme of lots, plenty or really big deal.

wen came time fo do da chores lidat - he neva like so we wen small kine go tell mom you know so she can small kine regulate ah. but u know he stay momma's boy - so his lickens was only small kine time out lidat and no moa dessert kine. ho da rest of us was small kine piss off - so we go tell daddy. daddy go tell us "eh neva mind, small kine dat - no worry - i take care bumbye." so afta dinnah was time for dessert - and we knew baby boy wasn't going get - but we neva expect what daddy was goin do. So daddy go bus out banana splits with erryting on top - tree kine flavahs, chocolate fudge, and small kine cherries, nuts and da whip cream...ho da look on baby boy's face wen we all wen eat um was small kine priceless.

storeez noun pl.
stories; fibs, lies; exagerrations

had one gurl she go make allkine storeez - she no kea. she jes go tell dis kine storeez about whateva she like. dakine no make sense sum times...da kine fo slaps alreddy.

noddah adj.
another

one noddah time wen makem alright but da noddah time jes wasn't dakine. jes wen wish we had one noddah chance fo makem right.

hanakokolele adj or adv.??
a child's rhyme to imply someone else has been caught doing something wrong.

hanakokolele - peanut buttah jehlay.

nevah foget phrase
"Never Forget!" September 11, 2001 - we will never forget.

jes 2 yeahs afta - we goin nevah foget - nevah foget - nevah foget! membah now - nevah foget!

garanz n. or v.
guarantee; implied confirmation of an occurrence or action

garanz ball baranz - gone have dat kine wen da aweoweo stay lidat. Fo sure no moa room on da pier an errybody stay hookin. garanz da watah stay all red lidat cuz so plenny kine fish lidat. even da kine lil old ladeez stay ova dea. errybody all elbow elbow cause dey like fo try get one space yeah. garanz gone have dakine ono dinnah tonite.

da word of da day: grindz n. or v.
food, especially good food; or the act of eating

da besses kine grindz stay dakine mo cheap and mo ono...neva foa get dat da uda ting is da grindz no can run out...bumbye hahd ah?

To find your own spesho kine grindz go to: Anytimegrinds it has great information about eateries, sorted and searchable by cuisine and location locally here in Hawaii...there are even menus and many of the listed restaurants offer catering services...a good starting ground for planning your party menu. This is a definite favorite on my links list now... it was amazing how there are actually a lot of the Haleiwa folks with menus posted...just love it.. check it out and signup!

da word of da day: howzit phrase; salutation
literally "how is it?"; hello- emphatically; often accompanied by the shaka sign and/or a handshake

we wuz driving down I-5 and den one guy jes wen buss out da kine howzit brah - throwing us da shaka - he mussa wen spock ouwa dakine Kam skoo sticka or da fish hook on da mira. We wen give him da howzit back too. He had da Hui sticka on his one.

da word of da day: nailz adj. or noun
not pleasing; rude; a rude action

i dunno ahh - about yo frenz - dey go come late den take off cuz dey no like da rain....soo nailz dem.

da word of da day: shoots v. or interjection
speak; do it; can - the ability to do something; exclamation of jubilee

Boy: shoots brah - what u like?
Pocho: neah nutting
Boy: no ack ah, I wen hea u need um
Pocho: no need um brah, jes likem lidat
Boy: den no skehd
Pocho: shoots alredy - wot stay da numbah
Boy: angel girl numbah stay - five-five-five-puka-puka-puka-puka
Pocho: u shua?
Boy: das da one...brah jes callem alredy - but no make any kine
Pocho: i nott
Pocho dials - clenching da cell phone in one vise kine grip - one sweet voice ansaz on da oda end
Angel: hello?
Pocho: hey howzit - dis Pocho - memba i was da one wit Boy down Pokai las weekend.
Angel: oh yeah - how i goin forget u? u wuz so cute lidat - but wot's wit yo fren - kinda off ah? nah,nah,nah - long time I know Boy from small kid time u know - but fo real he is kinda off.
Pocho: fo real.
Angel: so wat he wen give u my numbah?
Pocho: uhhh...yeah ....
Boy: c'mon brah git wit it alreddy ask her out - jes chance um...
Pocho: shhhh.....
Angel: what was dat?
Pocho: shua made me nerjous fo call tho.
Angel: why is dat?
Pocho: Cause I neva wen meet one girl as pretty as you befo, espesho one girl who's so cool and u know can jes talk story...
Angel: how much girlz u wen meet...?
Pocho: oh- not so much...i don't really meet girls...
Angel: how you know I da most pretty one den?
Pocho: jes cause.
Angel: giggling how u know how fo sweet talk ah?
Boy: unda his breath brah git to da dinnah - going out - going dance - cmon....
Pocho: so wen can I see moa of you?
Angel: wot???!
Pocho: i mean wen can I take u out sometime? dinna, one movie, dancing?
Angel: ho - shoots dats da whole nine yahdz.
Pocho: is dat a yes?
Angel: 'ae..
Boy: she wen say yes ah? she dunno wot she stay in fo...
Pocho: unda his breathshhhhhh-uddup.
Angel: wot????!!!
Pocho: i mean shoots den - Saturday nite. howz 8?
Angel: jes right. see you den.
Pocho: yeah see you den. bye.
click. the phone goes to dial tone
Boy: See how hard wuz dat?
Pocho: notso bad, nutso bad...

da word of da day: kukapile adj.
derived from kukae + pile = "shit-load"
a lot; plenty; lots of stuff that may be undesirable; too much; excess; trash

dea's a kukapile tings foa do dis weekend...neva mine pley any kine cuz godda finish all deez tings furst. daddy used fo say - "furst tings furst" and "erryting has itz place". Doz is wize wordz. but stay kukapile heavy kine on my mine.

da word of da day: bodobodo adj.
used condition; busted up condition; relaxed; second-hand

you need da kine bodobodo clothes fo work in da yard...bumbye da ting come stain lidat...

da word of da day: da bruddahs plural n.
the brothers; syblings; the guys; friends; two local comics with a show on local cable station OC-16; the show on OC-16

i was jes hangin wit da bruddahs - you know kickin back - shoot da breeze lito bit. had some ono kine pupu - 'opihi, tako poke, sashimi and chicharones. one of da braddahs - Boy -stay his birtday - so he wen do plenny kine shots tequila. hooee - he came smallkine lolo real fas. bumbye Mano he go call dis braddahs fo real kine bruddah - Jr. Boy - fo come ova fo drag his okole home alreddy - cuz he was all dakine "beligarant" ah alreddy. when da bruddah came - no joke - Boy neva like go wit Jr. Boy - ho waz unreal! So da uddah bruddahs had fo go crank Boy so Jr. Boy could put em in da pickup alreddy. Da Bruddahs neva can relax til da braddahs wen fo go - jes den we all go fo watch da bruddahs buckaloose.

da word of da day: galagalaz; galaz n.
mucus - especially the sort that you cough up or spit out

you know wen you get da kine galagalaz and da buggah stay stuck - wot u goin do? da kine u head stay achin and u go try fo blow um out but da ting no like. das da worses kine yeah? but mo worse stay wen da galaz stay comin out and u no can hollem back. da ting stay running out da noz - out da eye like makapiapia all build up and even stay all itchy chroat kine - time fo see da doctah dat kine.

da word of da day: tadantadan adj.
stuck up; egotistical; big body

all tadantadan
da buggah need some lickins
no can ack lidat

da word of da day: hamajang adj.
all messed up

da ting was all hamajang lidat - neva can fixum. wen try one time but neva like. was all dakine hamaz.

da word of da day: nevah adv.
never; something that did not happen or occur in the past, or in a future tense will not occur

nevah in a million yeahs u going get chance lidat; nevah mine wot dat stay all about kay.

da word of da day: bumbye n.
at another time; later

bumbye you go find out how da ting feel wen you make li dat...bumbye i tell u how fo act...you goin learn bumbye...

da word of da day: hanakusa or hanabada n.
mucus; esp. from the nose

back den in da hanabada day, my favrit ting fo do wuz da kine spooky storeez. tell um wit da cuzins or lissen gud wen aunty or unco go fo tell um. Mama she go tell da bes kine storeez do - like da frog man, or da Kane'ohe Bay Giant how he go swim, or da one about kahuna man in da red lawalawa who go sit unda dea mango tree wen she live Puunui. Mama she get all kine storeez. One stay about her own kine hanabada dayz how dea neighbah go call grandma cuz she see my mama (small kine girl back den) playing in da pak wit da menehunes. Dem buggahs rascal u know. no can make li dat wit dem - bumbye no good. My grandma wen run to da pak for get my mom - she tell how she wuz playing wit da tiny kine guys. Grandma tell her no good - no play wit dem eva again. Bumbye afta my mama came mo old - high skoo time - dey find little footprints running around da house and get one ditch near da creek go by da house. Grandma tell dem for push da dirt inside da hole cuz dat's how da kine menehune come ova dea house. dey go fo do em - but da puka she come open one moa time. again dey push da dirt. again she hemo again. finally, one day mama say da hole no open again. dem menehune musta figah pau alreddy.

da word of da day: gunnfunnit
an expletive short for "God Fun It"

Cockaroach Numbah 1: i neva wen undastand fo why u go fo make lidat?
Cockaroach Numbah 2: watchu talkin?

Cockaroach Numbah 1: da kine ways you go make u wings all da kine.
Cockaroach Numbah 2: hanh

Cockaroach Numbah 1: fo real u tink you sumting spesho?
Cockaroach Numbah 2: not even brah!

Cockaroach Numbah 1: den how cum den cuz?
Cockaroach Numbah 2: u know - i jes wen fo stretch um lil bit afta dat place.

Cockaroach Numbah 1: wat place iz dat?
Cockaroach Numbah 2: da one cuz

Cockaroach Numbah 1: which one iz dat?
Cockaroach Numbah 2: da one da one!

Cockaroach Numbah 1: gunfunnit - jes tell me alreddy.
Cockaroach Numbah 2: u know dat place had all da kine chix.

Cockaroach Numbah 1: nah?
Cockaroach Numbah 2: fo real.

Cockaroach Numbah 1: sorry ah.
Cockaroach Numbah 2: no worriez blueberriez.